ԱՄՆ-ը եւ ՆԱՏՕ-ն մեղսակի՞ց են Ռաբանիի սպանությանը

Իրանի խորհրդարանի նախագահ Ալի Լարիջանին, մեկնաբանելով Աֆղանստանի նախկին նախագահ Բուրհանուդդին Ռաբանիի սպանությունը, այսօր հայտարարել է, որ ԱՄՆ-ին ու ՆԱՏՕ-ին հարկ է ընդունել երկուսից մեկը՝ կա'մ նրանք իրենք են մեղսակից Աֆղանստանում կատարված մի շարք աղմկահարույց սպանություններին, կա'մ պարզապես անկարող են անվտանգություն ապահովել այդ երկրում. հաղորդում է «Արմենպրեսը»:

Լարիջանին խոսել է Աֆղանստանից օտարերկրյա ուժերը շուտափույթ դուրս բերելու անհրաժեշտության մասին, նաեւ հավելել է, որ Ռաբանիի սպանությունը ամերիկացիների եւ նատօականների կողմից խոստացված ժողովրդավարության դրախտի եւ ահաբեկչության դեմ պայքարի հաղթանակի ակնառու օրինակ է: