Ավստրալիայում երրորդ սեռի անձինք կան

Այսուհետ Ավստրալիայի քաղաքացիներն անձնագրում իրենց սեռը նշելիս երկուսի փոխարեն երեք հնարավորություն կունենան:

Ինչպես տեղեկացնում է BBC-ն, երկրում պայքար է սկսվել ոչ ավանդական սեքսուալ կողմնորոշում ունեցողների նկատմամբ խտրականության դեմ: Տրանսսեքսուալները եւ մարդիկ, ովքեր դեռ վերջնականապես չեն կողմնորոշվել, անձնագրում սեռը նշելիս կարող են ընտրել «չի հաստատվել» տարբերակը, որն անձնագրում կնշվի «X» տառով:

Ըստ ավստրալացի սենատոր Լյուսի Պրատի, որի զուգընկերը ծնվելիս իգական սեռի է պատկանել, իսկ ներկայումս տղամարդ է, այդ բարեփոխումը լրջորեն կբարելավի, օրինակ, ճանապարհորդների դրությունը: Ներկայումս բազմաթիվ ավստրալացիների այլ երկրների օդանավակայաններում ձերբակալում ու հարցաքննում են, քանի որ անձնագրում նշված սեռը չի համապատասխանում նրանց արտաքինին:

Նշենք, որ Ավստրալիայում նախադեպ կա: Անցյալ տարի այդ երկրի մի քաղաքացի դարձավ առաջին մարդն աշխարհում, որի  փաստաթղթերում սեռի դիմաց գրված է «անորոշ»: