Պահանջում ենք լքել զուգարանը

Երեկ ԱՄՆ-ում երկու ռազմական կործանիչ է օդ բարձրացել` հավանական վտանգը կանխելու համար: Բանն այն է, որ 2 ուղեւորատար ինքնաթիռների անձնակազմերի ղեկավարներն ահազանգել են, թե ինչ-որ զույգեր զուգարանում երկար ժամանակ փակված են մնացել. տեղեկացնում է gazeta.ru-ն:

Կործանիչներն ուղեկցել են ինքնաթիռներին այնքան ժամանակ, մինչեւ նրանք վայրէջք են կատարել մոտակա օդանավակայաններում: Բարեբախտաբար, արտակարգ դեպքեր չեն գրանցվել:

«Ավելորդ զգուշության պատճառով երկու կործանիչներ ուղարկեցինք: Բանն այն է, որ երեկ (սեպտեմբերի 11-ի ահաբեկչության 10-րդ տարելիցի օրը.- խմբ.) հսկվում էին բոլոր թռիչքները»,- պարզաբանել է ԱՄՆ ռազմաօդային ուժերի ներկայացուցիչը:

Բացի այդ, երեկ Կանզասի օդանավակայանի մի մասը փակել են այն բանից հետո, երբ մի ուղեւոր չի համաձայնել ցույց տալ, թե ինչ է գտնվում անվտանգության աշխատակիցների համար կասկածելի թվացող իր ուղեպարկում: