Անբարենպաստ եղանակի պատճառով բերքի կորուստ է եղել

Սյունիքի մարզում օգոստոսի կեսից հաստատված անբարենպաստ եղանակի պատճառով բերքի կորուստ է եղել:

Yerkir.am-ին մարզպետարանից տեղեկացրին, որ Սիսիանի եւ Գորիսի տարածաշրջանների բարձրադիր գոտիների համայնքներում ժամանակին չի իրականացվել մոտ 700 հա հացահատիկի բերքահավաք: Արդյունքում` գերխոնավության հետեւանքով հասկի մեջ ցորենի հատիկը ծլել է, եւ ստացված բերքը կարող է օգտագործվել միայն որպես անասնակեր:

Տուժել են նաև Կապանի տարածաշրջանի Դավիթ Բեկ գյուղի ցանքատարածությունները:

Մասնագետների հավաստմամբ` բերքի կորուստը կազմել է 20-30 տոկոս, եւ բերքի ցածր որակի պատճառով 1 կգ-ի արժեքը մոտ 20 դրամով պակաս կլինի:

Ըստ մարզպետարանի աշխատակազմի գյուղատնտեսության եւ բնապահպանության վարչության պետ Սամվել Թանգյանի` մարզում ֆերմերային տնտեսություններին ժամանակին չի հաջողվել հնձել կառավարության կողմից տրամադրված էլիտար սերմացուով կատարված մոտ 30 հա ցանքատարածություն, որի հետեւանքով գյուղացին կանգնել է պայմանագրային պարտավորությունները ժամանակին չկատարելու փաստի առջեւ:

Ժամանակին եւ որակով աշնանացան իրականացնելու համար, մարզպետարանի միջնորդությամբ, տուժած համայնքները կստանան նախատեսվածից ավելի սերմացու: