Երեք մրցանակ` 600.000-ական դրամ պարգևով

Սեպտեմբերի 25-ից հոկտեմբերի 10-ը Երևանում «Մրցանակաբաշխություն-2011»-ի շրջանակներում, ՀՀ մշակույթի նախարարության աջակցությամբ, առաջին անգամ կանցկացվի Երիտասարդական երգչախմբերի հանրապետական մրցույթ-փառատոն:

Փառատոնի նպատակն է նպաստել Հայաստանի գիտական ու ստեղծագործական մտավորականության գործունեության ակտիվացմանը, աջակցել երկրի մշակութային կյանքի աշխուժացմանը:

«Մեր երկիրն ունի երգչախմբային հզոր պատմություն, իսկ վերջին տարիներին այն զարթոնք է ապրում»,- ասաց Հայաստանի երգչախմբային ընկերության նախագահ Դավիթ Ղազարյանը:

Ռուսաստանի հայերի միության հայաստանյան մասնաճյուղի նախագահ Վլադիմիր Աղայանն էլ իր հերթին նշեց, որ փառատոնը նվիրվում է ՀՀ անկախության 20-ամյակին:

Նշենք, որ մրցույթի մասնակից երգչախմբերի ելույթները պետք է լինեն 20 րոպեից ոչ ավելի և պարտադիր կերպով ներկայացնեն Կոմիտասի խմբերգերից, հայ կոմպոզիտորների ստեղծագործություններից: Մրցույթի համար սահմանված է երեք մրցանակ` 600.000-ական դրամ պարգևով, խրախուսական երեք մրցանակ, պատվոգիր և դրամական պարգև` 200.000-ական դրամ:

Մրցույթ-փառատոնի գալա համերգն ու մրցանակների հանձնումը տեղի կունենա հոկտեմբերի 14-ին` Արամ Խաչատրյան համերգասրահում: