"Հարսնաքարի" դեպքի ժամանակ Սաշիկ Սարգսյանի որդին Հայաստանում չի եղել

Օգոստոսի 14-ի լույս 15-ի գիշերը` «Հարսնաքար» ռեստորանային համալիրում արձանագրված դեպքի օրը, Սաշիկ Սարգսյանի որդին Հայաստանում չի եղել: Այս մասին հայտարարեց ՀՀ ոստիկանապետ Ալիկ Սարգսյանն այսօր` կառավարության նիստից հետո պատասխանելով լրագրողների հարցերին: 

«Բոլոր քաղաքացիներն օրենքի առջև հավասար են»,- ասել է ոստիկանապետը և հավելել, որ դեպքի առթիվ հարուցվել է քրեական գործ ոստիկանության քննչական վարչությունում: Ոստիկանապետը խոստացել է, որ քննության շրջանակում մանրամասն լրատվություն կտրամադրվի:

Ալիկ Սարգսյանը կոչ արեց խնդիրը չքաղաքականացնել, քանի որ իրականում այն «այնքան քաղաքականացված չէ, այնքան էլ որոշ անձանց հետ կապված չէ, որքան լրատվամիջոցներն են կապում»: