Եկեղեցին չի ուզում զիջել իր տեղը մզկիթին

Թուրքիայի արեւմուտքում` Իզմիր նահանգի Չեշմե քաղաքում գտնվող մզկիթը վերականգնումից հետո ավելի շատ քրիստոնեական դիմագիծ է ձեռք բերել, քան մահմեդական: Ինչպես գրում է «Զամանը», դա առաջացրել է տեղի մահմեդականների զայրույթը:

Ալաչաթը մզկիթի շենքը կառուցվել է 1874 թվականին եւ մինչեւ Թուրքիայի Հանրապետության ձեւավորումը եղել է Սբ Կոնստանտին եկեղեցին: Թուրքիայի նոր իշխանությունների հրամանով` 1920 թվականին այն վերածվել է մզկիթի, որին կից կառուցվել են մինարեթներ: Ընդ որում` մահմեդականացման ընթացքում քրիստոնեական սրբապատկերները ծածկվել են սվաղով կամ, ինչպես հաճախ է կատարվում Թուրքիայում, ոչնչացվել են:

Որպես մզկիթ գործելու ողջ ընթացքում շենքը, անհրաժեշտ խնամք չստանալով, սկսել է փլուզվել: Այդ կապակցությամբ տեղի իշխանությունները 2009-ի սեպտեմբերին սկսել են մոտ 1 միլիոն եվրոյի վերանորոգման աշխատանքներ իրականացնել, սակայն շենքի կոսմետիկ վերանորոգումը չի բավարարել հավատացյալներին. վերականգնվել են քրիստոնեական որմնանկարները, աստվածաշնչյան պատկերները, եկեղեցու զոհասեղանը, որն իսլամում ընդունված չէ:

Չեշմեի իշխանությունները եւ Իզմիրի նահանգապետը բողոքներով բազմաթիվ նամակներ են ստացել: Իշխանությունները հանձնարարել են «վերացնել վերանորոգման ժամանակ ի հայտ եկած թերությունները»: