Տոնական միջոցառումներ` անկախության 20-ամյակին

ՀՀ անկախության 20-ամյակին նվիրված տոնակատարության միջոցառումները նախապատրաստող և կազմակերպող պետական հանձնաժողովի հաստատած ժամանակացույցին համապատասխան` մարզերում ու մայրաքաղաքում ՀՀ մշակույթի նախարարության կողմից նախատեսվում են անցկացնել տոնական մի շարք միջոցառումներ. մասնավորապես, Հայասատանի պատմության թանգարանում կբացվի «Հայաստանի երեք հանրապետությունները. նվաճումներ և խորհրդանիշներ» խորագրով ցուցահանդեսը, իսկ ՀՀ կենտրոնական բանկի հետ համատեղ` Հայաստանի Հանրապետության կենտրոնական բանկի հուշադրամների ցուցադրությունը: Հայաստանի պատմության թանգարանում ՀՀ մշակույթի, ՀՀ կապի և տրանսպորտի նախարարությունները «Հայփոստ» ՓԲԸ -ի և Հայաստանի ֆիլատելիստների միության հետ համատեղ կներկայացնեն ՀՀ նամականիշերի ցուցահանդեսը:
Հայասատանի նկարիչների միությունում կբացվի «Անկախության գունապնակ»` անկախության տարիների գեղանկարչության ցուցահանդես:
ՀՀ մշակույթի նախարարությունը Հայաստանի հանրային հեռուստառադիոընկերության, Հայաստանի կոմպոզիտորների և երաժշտագետների միության հետ համատեղ կիրականացնի ՀՀ օրհներգի մասնագիտական ձայնագրում` տարբեր կատարումներով:
Պետական պատվերով կհրատարակվի «Հայ կինո. անկախության տարիներ», «Անկախության 20 տարիները լուսանկարներում», «Անկախության սերունդ» ժողովածուները, ինչպես նաև` անկախության 20-ամյակին նվիրված նկարչական ցուցահանդեսի կատալոգը: