Վարչական վարույթ` "Երեւան SET" սուպերմարկետի նկատմամբ

ՀՀ տնտեսական մրցակցության պաշտպանության պետական հանձնաժողովն այսօր վարչական վարույթ է հարուցել Հրազդան քաղաքում գտնվող «Երեւան SET» սուպերմարկետի նկատմամբ օրենքի հնարավոր խախտման առնչությամբ:

Նշենք, որ Կոտայքի մարզի Հրազդան քաղաքի կենտրոնում գործող «Երեւան SET» սուպերմարկետի ապրանքային նշանը շփոթության աստիճան նման է «Երեւան CITY» սուպերմարկետների ցանցի ապրանքային նշանին:

Համաձայն «Տնտեսական մրցակցության պաշտպանության մասին» ՀՀ օրենքի` ձեռնարկատիրական գործունեության ցանկացած գործողություն կամ վարքագիծ, որն առաջացնում է կամ կարող է առաջացնել շփոթություն այլ տնտեսվարողի գործունեության կամ առաջարկած ապրանքների նկատմամբ, համարվում է անբարեխիղճ մրցակցության գործողություն: Մասնավորապես` այս դեպքում շփոթության առաջացում է համարվում այլ տնտեսվարողին պատկանող ապրանքային կամ սպասարկման նշանի նմանակումը: