Տոնից մեկ շաբաթ առաջ` 7-օրյա պահք

Վարդավառը հայ ժողովրդի հնագույն ծեսերից է և հագեցած է ավանդություններով, սովորույթներով: Բյուրավանի Սուրբ Գրիգոր Լուսավորիչ եկեղեցու հոգևոր հովիվ Տեր Ղազար քահանա Պետրոսյանն ասաց, որ Վարդավառից մեկ շաբաթ առաջ սկսվում է 7-օրյա պահքը, որից դուրս են գալիս` հաղորդություն ստանալով:

Ազգագրագետ Հասմիկ Աբրահամյանն էլ նշեց, որ որոշ տեղերում ազգագրական սովորույթ է պասը լուծել խնձորի խորովածով:

«Նախատոնական օրը ընդունված է ընտանեկան հավաք կազմակերպել, տանտիկինները հիմնականում պատրաստում են բանջարեղենային ուտեստներ, քաղցրավենիք`հալվա, որը խորհրդանշում է առատությունը: Ավանդական կենցաղում ընդուված է եղել ընդհանուր մատաղ ճաշակել, իսկ այժմ յուրաքանչյուրն իր համար է մատաղ մատուցում, սակայն պահպանվել է մատաղը տներով բաժանելու սովորույթը»,- պատմեց նա:

Նշենք նաեւ, որ այդ օրը կազմակերպվում էին նաեւ ուխտագնացություններ դեպի Մշո Սուրբ Կարապետ վանք: