Ինչո՞ւ են երիտասարդները շտապում պատկերասրահ

Հուլիսի 7-ից Հայաստանի Ազգային պատկերասրահում ներկայացվում է «Դալին եւ սյուրռեալիստները» հավաքածուն:

Ցուցահանդեսում ներկայացված է 160 աշխատանք` Դալիի և սյուրռեալիստական ուղղության այնպիսի ճանաչված նկարիչների նկարներ, ինչպիսիք են Հանս Բելմերը, Լեոնոր Ֆինին, Ջորջո դե Կիրիկոն:

Ցուցահանդեսի կազմակերպիչ Իրինա Բախտամյանը նշեց, որ ցուցահանդեսում ներկայացված են նաեւ հայ նկարիչների 40 աշխատանք: «Ներկայացված են այն նկարիչների նկարները, որոնց մոտ զգալի է սյուրռեալիզմի ազդեցությունը, ինչպես, օրինակ, Երվանդ Քոչարը, Սերգեյ Փարաջանովը, Հակոբ Հակոբյանը, Լեւոն Թութունջյանը»,- ասաց նա:

Ի. Բախտամյանի խոսքերով` Սալվադոր Դալիի ցուցահանդեսի շրջանակներում այցելուների թվի աննախադեպ աճ է գրանցվել:

«Այցելում են հիմնականում երիտասարդները, որոնց մոտ զգացվում է հետաքրքրություն դեպի սյուրռեալիզմը»,- ասաց նա` հավելելով, որ առաջիկայում սպասվում են շատ հետաքրքիր ծրագրեր:

Պերճուհի ԳԵՎՈՐԳՅԱՆ