Հայ ժողովուրդն անհավատալիորեն կենսունակ է

ԱՄՆ դեսպանատունն արդեն 5-րդ անգամ աջակցում է «Ոսկե ծիրան» կինոփառատոնին, և այս տարի ամերիկացի ռեժիսոր Բրեյդեն Քինգի «Այստեղ» ֆիլմն ընդգրկված է «Երևանյան պրեմիերաներ» ծրագրում:

Ռեժիսորը նշեց, որ թեեւ ֆիլմն արդեն երկու պրեմիերա է ունեցել, սակայն իր համար ամենահուզիչ իրադարձությունն էր ֆիլմը Հայաստան բերելը, քանի որ այն հենց այստեղ է նկարահանվել:

Երբ ռեժիսորն առաջին անգամ ժամանել է Երևան, կարծես ինքն ու Երեւանը ճանաչել են իրար: «Դա նման է այն բանին, երբ սիրահարվում ես մեկին, որի մասին քիչ բան գիտես, բայց ցանկանում ես պահել այդ հարաբերությունը»,- ասաց նա:

Ֆիլմում նկարահանվել են ոչ միայն դերասաններ, այլև սովորական մարդիկ: «Անհավատալի հաճույք էր աշխատել հայ դերասանների հետ, ազգային խտրականություն չէի զգում»,- խոստովանեց ամերիկացի ռեժիսորը:

Ցեղասպանության հարցի վերաբերյալ Քինգն ասաց, որ դա խոր վերք է, բայց ոչ մահացու. «Հայ ժողովուրդը կա և անհավատալիորեն կենսունակ ժողովուրդ է»: