Երկու պահպանակն էլ չի օգնի, եթե կիրառելու ձեւը չգիտես

Հայաստանում տարեցտարի ավելանում է սեռավարակներով հիվանդ մարդկանց թիվը, եւ, չնայած դրան, պաշտոնական տվյալները մնում են նույնը. վարակակիրների մոտ 30-40 տոկոսն է միայն գրանցվում. լրագրողների հետ հանդիպման ժամանակ հայտարարեց Մաշկաբանության եւ սեռավարակների գիտաբժշկական կենտրոնի փոխտնօրեն Գուրգեն Փորսուղյանը:

Մասնագետը նշեց, որ Հայաստանում գրանցված  է սեռավարակներով տառապող մոտ 30-35 հազար  հիվանդ, սակայն իրական թիվն իմանալու համար հարկավոր է այս թիվը բազմապատկել մի քանի անգամ:

«Հայաստանում նվազել է նաեւ առաջին սեռական հարաբերություն ունեցող տղաների տարիքը. եթե տարիներ առաջ այն 17-18 էր, այժմ` 15-16»,- տեղեկացրեց պարոն Փորսուղյանը:

Սեքսապաթոլոգիայի կլինիկայի մասնագետ Վրեժ Շահրամանյանն էլ նշեց, որ տղաները երբեմն 2 պահպանակ են օգտագործում` առավել պաշտպանված լինելու համար, սակայն նրանցից շատերը չգիտեն անգամ պահպանակի օգտագործման ձեւը:

«Առողջ սեռական մտածելակերպի բացակայության պատճառով չեն դիմում բժշկի` չկիրառելով նաեւ կանխարգելիչ միջոցներ: Անհրաժեշտ է, որ բարձր դասարաններում սեռական վարակներից խուսափելու միջոցների ծանոթացման դասընթացներ լինեն, թե չէ վիճակը գնալով վատանում է»,- ասաց նա:

Սեքսապաթոլոգն ավելացրեց, որ մարզերում սեռական կյանքի մասին տեղեկատվության պակասից տուժում են թե' աղջիկները, թե' տղաները, եւ մարզերն ավելի խոցելի են այս առումով: