Ոստիկանապետը հերքում է

Այս պահին ոստիկանության քրեական հետախուզության գլխավոր վարչության պետ Հովհաննես Թամամյանի գործով նոր զարգացումներ չկան: Այն ընթացքի մեջ է, շուտով երեւի կուղարկվի դատարան, իսկ դատարանի վճռից արդեն պարզ կլինի` ինչ է իրականում կատարվել. այսօր լրագրողներին ասել է ոստիկանապետ Ալիկ Սարգսյանը` հավելելով, որ գործով նոր վկաներ չկան:

Ի պատասխան լրագրողների հարցերի` նա նշել է, որ Հովհաննես Թամամյանի եւ Լեւոն Գուլյանի գործերի միջեւ կապ չկա. «Կարծում եմ, որ ընդհանրապես կապ չունեն իրար հետ: Ինչպես հաճախ մամուլում լինում է, դրանք ենթադրություններ են` գեղարվեստական թեքումներով: Եթե այդպիսի ինֆորմացիա լիներ, ես գոնե կիմանայի, գոնե զեկուցած կլինեին»:

Հիշեցնենք, որ խոսքը 2007 թ. մայիսին ոստիկանության շենքում` դեռեւս չպարզված հանգամանքներում մահացած Լեւոն Գուլյանի մասին է: Նրա մահից հետո մամուլում սկսեցին լուրեր շրջանառվել, որ դա եղել է սպանություն, որի հետ կապ է ունեցել Հովհաննես Թամամյանը: