ՄԱԿ-ի Գլխավոր ասամբլեան միաձայն փոխել է իր նախագահին

Երեկ ՄԱԿ-ի Գլխավոր ասամբլեան նախագահն է ընտրել Քաթարի վետերան դիվանագետ Նասեր Աբդել Ազիզ ալ Նասերին:

ՄԱԿ-ում աշխատող դիվանագետների խոսքերով` նա դժվար թե բարդություններ ստեղծի արեւմտյան պետությունների համար. տեղեկացնում է mignews.com-ը:

Նասերը, որը ՄԱԿ-ում Քաթարի ներկայացուցիչն է 1998 թվականից, կփոխարինի շվեյցարացի Յոզեֆ Դայսին սեպտեմբերին: Միաձայն ընտրվելով` Նասերը 192 անդամ երկրների ներկայացուցիչներին հայտարարել է, որ պատրաստվում է կամուրջ լինել զարգացած, զարգացող եւ քիչ զարգացած երկրների միջեւ: Նա հավելել է, որ հիմնական ուշադրությունը սեւեռելու է աշխարհի առջեւ այսօր ծառացած կարեւորագույն հարցերում կոնսենսուսի ձեռքբերմանը: Այդ հիմնախնդիրներն են` զինված հակամարտությունները, կլիմայի փոփոխությունը, պայքարը աղքատության դեմ, բնական աղետների հետեւանքների վերացումը: