Ստեփանակերտ-Երեւան-Ստեփանակերտ՝ նոր ավտոբուսներով

Մի քանի ամսից Ստեփանակերտ-Երեւան-Ստեփանակերտ երթուղու ուղեւորների համար անցյալում կլինեն հին ու մաշված «Գազել»-ներն ու «Ֆորդ»-երը, նաեւ անհարմարավետ պայմաններում երթեւեկելը։

ԼՂՀ արտադրական ենթակառուցվածքների նախարար Կառլեն Պետրոսյանի տեղեկացմամբ`  այս տարվա ապրիլին երթուղու նոր մրցույթ էր հայտարարվել, սակայն այն չէր կայացել՝ մասնակից չլինելու պատճառով։

«Լրացուցիչ մրցույթը հայտարարվել է օգոստոսի 16-ին։ Այս շահութաբեր երթուղու փաթեթում են նաեւ Քաշաթաղի եւ Շահումյանի շրջանների ոչ շահութաբեր գծերը»,- մեզ հետ զրույցում նշեց նախարարը, որի կարծիքով՝ մրցույթին մասնակցելը յուրօրինակ հայրենասիրություն է, քանի որ մեծ գումարներ պետք է ներդրվեն՝ երկար ժամանակ անց դրանք վերադարձնելու ակնկալիքով։

Սակայն նախարարի կարծիքով` նման մարդիկ, այնուամենայնիվ, կան, եւ նա համոզված է, որ օգոստոսի 16-ից հետո երթուղին կսպասարկեն ժամանակակից ու հարմարավետ ավտոբուսներ։