Հայաստանում ներդրվում է տախոգրաֆիայի համակարգ

Ավտոտրանսպորտի միջազգային միության (IRU) կողմից Երեւանում անցկացված նիստի ժամանակ ՀՀ տրանսպորտի եւ կապի նախարար Մանուկ Վարդանյանը հայտնեց, որ Տախոնետի Եվրահանձնաժողովի գլխավոր գրասենյակը (նստավայրը` Իսպրա, Իտալիա) հուլիսի 8-ին Հայաստանին է հանձնել թվային տախոգրաֆների քարտերի պատրաստման ազգային բանալիները:

Նախարարը նշեց նաեւ, որ տախոգրաֆիայի համակարգը ԱՊՀ երկրներում ներդրվել է միայն Բելառուսում: Որոշ քայլեր իրականացվել է նաեւ Ռուսաստանի եւ Ուկրաինայի կողմից:

«Համակարգի ներդրման ժամկետների առումով Հայաստանը համարվում է ԱՊՀ առաջատարներից մեկը: Նշեմ նաեւ, որ Եվրամիությունն արգելել է առանց տախոգրաֆիկ քարտերի բեռնատար մեքենաների մուտքն իր տարածք, իսկ նման արգելքներ ֆորմալ առումով գործում են նաեւ Ռուսաստանում եւ Ուկրաինայում»,- ասաց Մ. Վարդանյանը:

Տախոգրաֆիկ քարտերն օգտագործվում են միջազգային բեռնափոխադրումներ իրականացնող բեռնատարներում, որը յուրօրինակ սեւ արկղ է:

«Այն էական նշանակություն ունի բեռների եւ վարորդների անվտանգության ապահովման համար»,- նշեց նախարարը` հավելելով, որ միջազգային բեռնափոխադրումներ իրականացնող բեռնատարների սեփականատերերը տախոգրաֆիկ քարտերից օգտվելու համար կվճարեն պետական տուրք:

Նախնական գնահատմամբ` տուրքի արժեքը 50 հազար դրամ է, թեեւ հնարավոր է` խորհրդարանում նախագիծը փոփոխության ենթարկվի: