Լեհաստանում ամերիկյան ռազմական ինքնաթիռներ կտեղակայվեն

Վարշավան եւ Վաշինգտոնը համաձայնագիր են ստորագրել Լեհաստանում 2013 թվականից ամերիկյան ռազմական ինքնաթիռներ տեղակայելու վերաբերյալ. տեղեկացնում է Gazeta Wyborcza-ն` վկայակոչելով Լեհաստանի պաշտպանության նախարարության մամուլի քարտուղարին:

Նախնական համաձայնագիրը ստորագրվել է ԱՄՆ նախագահ Բարաք Օբամայի` այս տարվա մայիսի վերջին Լեհաստան կատարած այցի ժամանակ:

Լեհաստանի պաշտպանության նախարար Բոգդան Կլիխի խոսքերով` վերջնական տարբերակը նախնականից շատ չի տարբերվում: Դրա համաձայն` Լեհաստանում տեղակայվելու են F-16 կործանիչներ եւ C-130 տրանսպորտային ինքնաթիռներ, նաեւ` օդաչուների պատրաստման մասնագետներ: Նպատակը լեհական եւ ամերիկյան օդուժերի օպերատիվ փոխհամագործակցության մակարդակի բարձրացումն է: