Հայաստանի և Վրաստանի հոգևոր առաջնորդները համատեղ հռչակագիր են ընդունել

Վրաստանի և Հայաստանի հոգևոր առաջնորդները Թբիլիսիում համատեղ հռչակագիր են ընդունել, որում, մասնավորապես, ասվում է.

«Վրաստանը և Հայաստանը հնագույն պատմության և մշակույթի երկրներ են, որտեղ առաքյալները քրիստոնեություն են քարոզել 1-ին դարում։ Հազարամյակների ընթացքում մեր ժողովուրդները ստիպված են եղել պայքարել կենդանի մնալու և ինքնությունը պահպանելու համար, և այդ պայքարում մենք հաճախ ենք կողք կողքի կանգել։

Բարիդրացիական և բարեկամական հարաբերությունները շարունակվում են առ այսօր, որի ապացույցն է Ամենայն Հայոց կաթողիկոսի և նրան ուղեկցող պատվիրակության այցը Վրաստան։ Այն ցույց տվեց, որ մեր փոխհարաբերություններն ավելի են զարգանում և նոր փուլ մտնում, ինչը ենթադրում է Վրաստանում Հայ Առաքելական եկեղեցու և Հայաստանում Վրաց Ուղղափառ եկեղեցու իրավական կարգավիճակի սահմանում, ինչպես նաև հավասարության հիմունքներով Վրաստանում հայկական (գրիգորյան) և Հայաստանում վրացական (դիոֆիզիտ) եկեղեցիների բացում։

Վերոնշյալը կյանքի կոչելու համար անհրաժեշտ ենք համարում` ստեղծել երկկողմանի միջեկեղեցական հանձնաժողով,  խնդրել վրացական և հայկական իշխանություններին՝ աջակցել այս հռչակագրի` ժամանակին իրագործմանը»։