Ադրբեջանի նախագահը զուգահեռ է անցկացրել Կոսովոյի եւ Ղարաբաղյան հակամարտությունների միջեւ

Ադրբեջանի իշխանությունների վարած թե' ներքին, թե' արտաքին քաղաքականությունը ադրբեջանցիների համար տհաճ է եւ դժգոհությունների տեղիք է տալիս:

Ինչպես գրում է ադրբեջանական «Ազադլըգ» թերթը, Սերբիա կատարած այցի ժամանակ Ադրբեջանի նախագահ Իլհամ Ալիեւը «ջուր է լցրել հայկական կողմի ջրաղացին»` զուգահեռ անցկացնելով Կոսովոյի եւ Ղարաբաղյան հակամարտությունների միջեւ:

Ալիեւը հայտարարել է. «Սերբիան Ադրբեջանի նման տուժել է անջատողականության պատճառով: Մենք հույս ենք հայտնում, որ դուք եւս կվերականգնեք ձեր երկրի տարածքային ամբողջականությունը»:

Թերթը նշում է, որ ժամանակին հայկական կողմը փորձում էր զուգահեռներ անցկացնել Կոսովոյի եւ Ղարաբաղյան հակամարտությունների միջեւ եւ օգտագործել Կոսովոյի նախադեպը Լեռնային Ղարաբաղի անկախության ճանաչման համար: Սակայն միջազգային կառույցները հայտարարեցին, որ Կոսովոյի խնդիրն այլ է: Իսկ Ալիեւն իր այդ հայտարարությամբ, ըստ թերթի, անտեսում է դրանց դիրքորոշումն այդ հարցում։