ՀԱՅԿԱԿԱՆ ԺԱՄԱՆԱԿ. Մի կերպ համոզել է

Շաբաթ օրը կայացած Ռուսաստան-Հայաստան ֆուտբոլային հանդիպումից առաջ կտրուկ վատացել է մեր թիմի ավագ Սարգիս Հովսեփյանի առողջական վիճակը. նա սննդային թունավորում է ստացել եւ նախորդ գիշերն անցկացրել է բժիշկների հսկողության տակ:

Ծանր գիշեր անցկացրած Հովսեփյանն արթնացել է հանդիպումից մոտ 4 ժամ առաջ, արագ ճաշել եւ հայտարարել, թե լիովին պատրաստ է խաղին: Սակայն պարզվել է, որ նա արդեն դուրս է մնացել հայտացուցակից: 38-ամյա Սարգիս Հովսեփյանը հուզված ու լացակումած դիմել է մարզչին` խնդրելով հնարավոր ամեն ինչ անել իրեն մեկնարկային կազմում ընդգրկելու համար:

«Ես պիտի խաղամ, ես կարող եմ»,- վստահ ասել է մեր թիմի ավագը:

ՈւԵՖԱ-ի հետ բանակցությունների արդյունքում հնարավոր է եղել փոխել հայտացուցակը, եւ Սարգիս Հովսեփյանը 120-րդ հանդիպումն է անցկացրել Հայաստանի հավաքականի կազմում: