Ինչո՞ւ է ստում Լեւոն Զուրաբյանը

Այսօր ՀԱԿ հանրահավաքի ընթացքում Կոնգրեսի համակարգող Լեւոն Զուրաբյանը հայտարարեց, թե իրենց երեք պայմանները կատարվել են, եւ  «քաղբանտարկյալները» ազատության մեջ են, ավելին` մասնակցում են հանրահավաքին, այդ թվում` «համաներված քաղբանտարկյալ» Շմավոն Գալստյանը:

Լեւոն Զուրաբյանը նաեւ  նշեց, որ արդարադատության նախարարության լրատվականից հավաստիացրել են` հունիսի 9-ին եւ 12-ին ազատվելու են նաեւ Սարգիս Հացպանյանն ու Մուրադ Բոջոլյանը, այնպես որ իրենք կարող են սկսել երկխոսությունը արտահերթ ընտրությունների շուրջ: Թե ի՞նչ կարիք կար ստելու, հայտնի է միայն իրեն եւ հանրահավաքի կազմակերպիչների շատ նեղ շրջանակին:

Բանն այն է, որ Սարգիս Հացպանյանը եւ Մուրադ Բոջոլյանը ազատ են արձակվելու ոչ թե համաներման արդյունքում, այլ նրանց պատժաժամկետը պարզապես ավարտվում է հենց այդ օրերին,  ուրեմն` արդարադատության նախարարությունը ՀԱԿ-ին «հավաստիացնելու» անհրաժեշտություն չուներ։

Ինչ վերաբերում է հանրահավաքի մասնակից` «համաներված քաղբանտարկյալ» Շմավոն Գալստյանին, ապա նա ոչ թե ազատ է արձակվել,  այլ պարզապես գտնվում է «պատժի կրման բաց ռեժիմում» եւ այսօր երեկոյան, ինչպես ամեն օր, ստիպված էր վերադառնալ եւ ներկայանալ քրեակատարողական հիմնարկ: