Վերին աստիճանի լուռ եւ զուսպ մնալու քաղաքականություն

Հայաստանում Ֆրանսիայի արտակարգ եւ լիազոր դեսպան Անրի Ռենոն այսօր լրագրողների հետ հանդիպման ընթացքում անդրադարձել է Դովիլյան հայտարարությանը` այն համարելով հստակ, ուժեղ եւ առանց երկիմաստությունների:

«Հայտարարության մեջ հստակ նշվում է, որ ժամանակը եկել է` մտածելու եւ գտնելու համաձայնագրի մշակման եզրեր: Այն զգուշացնում է` ձեռնպահ մնալ ուժի կիրառումից եւ հորդորում է հակամարտող կողմերին հնարավորինս արագ համաձայնության եզրեր գտնել: Ես հաստատ համոզված եմ, որ բոլոր կողմերը հստակ հասկացել են այդ ուղերձի կարեւորությունը, եւ հուսով եմ` երկու կողմն էլ այդ ընկալումը կցուցաբերեն Կազանում կայանալիք հանդիպման ժամանակ»,- ասաց դեսպանը:

Անրի Ռենոն գրեթե չպատասխանեց լրագրողների` ԼՂՀ հարցի կարգավորման մասին հարցերին` պատճառաբանելով, որ իրենց երկրի դեսպաններին չի վերապահվում պատասխանել նման հարցերի, քանի որ իրենք համանախագահ ունեն: «Ուստի, այս առումով Ֆրանսիայի դեսպանը պետք է ցուցաբերի վերին աստիճանի լուռ եւ ավելի զուսպ մնալու քաղաքականություն»,- նշեց նա: