Հայ-իրանանական միջկառավարական նիստ` Թեհրանում

Թեհրանում երեկ մեկնարկվել է Հայաստանի Հանրապետության եւ Իրանի Իսլամական Հանրապետության միջկառավարական հանձնաժողովի 10-րդ նիստը, որը շարունակվում է նաեւ այսօր: Նիստին մասնակցելու համար Թեհրան է մեկնել հայկական պատվիրակությունը` Հայաստանի էներգետիկայի եւ բնական պաշարների նախարար Արմեն Մովսիսյանի գլխավորությամբ:

Ինչպես տեղեկացնում է նախարարության մամուլի ծառայությունը, նիստում կքննարկվեն 2010թ. հունվարի 27-ին Երեւանում կայացած նախորդ նիստի ընթացքում երկու երկրների միջեւ ձեռք բերված պայմանավորվածությունների արդյունքները, առաջիկա ծրագրերն ու հեռանկարները, մասնավորապես` էներգետիկայի, բնապահպանության, տրանսպորտի եւ կապի, գյուղատնտեսության, քաղաքաշինության, մշակույթի, սպորտի եւ այլ ոլորտներում:

Այցի ընթացքում նախատեսված են նաեւ մի շարք հանդիպումներ ԻԻՀ բարձրաստիճան պաշտոնյաների, կառավարության անդամների հետ: