74 տարի ազատազրկում` բռնաբարության համար

Սեռական բռնության մեղադրանքով Նյու Յորքում կալանավորված` Արժույթի միջազգային հիմնադրամի կառավարիչ Դոմինիկ Սթրոս-Կանը մինչ հաջորդ դատական նիստը կմնա բանտում:

Նրա փաստաբանները ցանկացել են 1 մլն դոլար գրավի դիմաց ազատել նրան, սակայն մերժում են ստացել:

Հաջորդ նիստը կկայանա մայիսի 20-ին: Եթե ԱՄՀ կառավարչին առաջադրված 7 մեղադրանքները հաստատվեն, նրան 74 տարի 3 ամիս ազատազրկում է սպառնում:

Ըստ որոշ տեղեկությունների` Սթրոս-Կանը ալիբի ունի. այդ ժամին նա ոչ թե հյուրանոցում է եղել, այլ ընթրել է դստեր հետ:

Ի դեպ, չի բացառվում, որ նույն մեղադրանքով նրան դատի տան նաեւ Ֆրանսիայում: Ֆրանսիացի լրագրող Տրիստան Բանոնակին հայտարարել է, թե 2002 թվականին ինքն էլ պաշտոնյայի կողմից սեռական բռնության է ենթարկվել: