Բողոքի ակցիա` նախագահականի մոտ

Արմավիրի մարզի Գայ գյուղի բնակիչներն այսօր կեսօրին, հավաքվելով նախագահի նստավայրի մոտ, փորձել են իրենց բողոքը հասցնել ՀՀ նախագահ Սերժ Սարգսյանին:

2002 թվականից, անհասկանալի պատճառներով, էլեկտրաէներգիայի պարտք է կուտակվել, իսկ գյուղի էլեկտրիկը որոշել է աշխատանքից ազատվելուց առաջ այդ պարտքը բաժանել ըստ իր կամքի` յուրաքանչյուր ընտանիքի վրա «բարդելով» 20-200 հազար դրամ:

Այս մութ պատմությունից հետո ՀՀ էներգետիկայի եւ բնական պաշարների նախարար Արմեն Մովսիսյանի հանձնարարությամբ ստեղծվել էր հանձնաժողով, սակայն բնակիչները չեն հավատում հանձնաժողովին: «Այնքան ենք պայքարելու մինչեւ հասնենք արդարության»,- հայտարարել են նախագահականի մոտ հավաքվածները:

Ըստ գյուղացիների` երբ հաշվիչները տներից հանվել ու տեղադրվել փողոցում` բարձր տեղում, միայն էլեկտրիկն է բարձրացել այնտեղ եւ ասել, թե ինչքան հոսանք են սպառել, իսկ իրենք այդ գումարները պատրաստակամորեն մուծել են: Գյուղացիները ցույց են տվել նախորդ տարիների մուծումների անդորրագրերը, որտեղ նշված չէ, որ նրանք պարտք ունեն: