Քոչարին` Ստամբուլում

Ապրիլի 25-30-ը Իսպանիայում անցկացված ազգային պարերի մրցույթ-փառատոնում «Կարին» ազգագրական երգի եւ պարի համույթը ճանաչվել է լավագույնը` պարի համար, իսկ երաժշտական անվանակարգում զբաղեցրել է 3-րդ պատվավոր տեղը. այսօր լրագրողների հետ հանդիպման ժամանակ նշել է համույթի գեղարվեստական ղեկավար Գագիկ Գինոսյանը:

Մրցույթին մասնակցել են 21 երկրների 28 պարային խմբեր, ընդ որում` Հայաստանն այս փառատոնին մասնակցել է առաջին անգամ:

Ըստ Գինոսյանի` հայկական մշակույթն այդքան էլ հայտնի չէ արտերկրում, սակայն դա չի խանգարել, որ հայկական պարը սիրվի օտարների կողմից: Նա նաեւ տեղեկացրել է, որ ապրիլի 24-ին ճակատագրի բերումով եղել են Ստամբուլում եւ ինչպես օդանավակայանում, այնպես էլ քաղաքի կենտրոնական հրապարակում պարել են հայկական քոչարին: