Բեն Լադենի դիակի պակիստանյան տարբերակը

Պակիստանի հեռուստաընկերությունները հայտարարել են, որ ամերիկյան զինվորների կողմից սպանված Ուսամա բեն Լադենի` ինտերնետում լայնորեն տարածված լուսանկարը կասկածի տեղիք է տալիս:

Ճիշտ է, դիակի լուսանկարն ու բեն Լադենի` 10 տարի առաջ արված լուսանկարները չափազանց նման են. բերանի եւ դեմքի արտահայտությունը երկու լուսանկարներում նույնն է, բացի այդ` 10 տարի առաջվա եւ վերջին լուսանկարի մորուքում ճերմակ թելերն էլ գրեթե չեն տարբերվում: Սակայն, ըստ պակիստանյան հեռուստաընկերությունների, դիակի լուսանկարը կեղծ է` բեն Լադենի հայտնի նկարներից մեկի` համակարգչով սարքված տարբերակը: Տարբերությունը միայն չալմայի բացակայությունն է:

Ամերիկյան մի պաշտոնյա հայտնել է, որ բեն Լադենի դին իրենց մոտ է, մինչդեռ Պակիստանի հեռուստաընկերությունները ցուցադրել են առավոտյան սպանված բեն Լադենի դին եւ հայտարարել, որ այն իրենց մոտ է: