Ռմբակոծումների լեգիտիմ թիրախ

Լիբիայի առաջնորդ Մուամար Քադաֆիի որդին` Սեիֆ ալ Իսլամ Քադաֆին, մեղադրել է ՆԱՏՕ-ի երկրներին իր հորը սպանելու փորձի մեջ:

Քադաֆի կրտսերի խոսքերով` Տրիպոլիի իշխանությունները երբեք չեն համաձայնի Արեւմուտքի թելադրած պահանջներին: Տեղական հեռուստաալիքին տված հարցազրույցում նա լիբիացի ապստամբներին հայրենիքի դավաճան է կոչել `հայտարարելով, որ նրանք են ՆԱՏՕ-ին խորհուրդներ տալիս Քադաֆիի զորքերի դեմ արդյունավետ գործողություններ իրականացնելու հարցում:

Երեկ ՆԱՏՕ-ի ռազմաօդային ուժերը հարվածներ են հասցրել Քադաֆիի` Տրիպոլիում գտնվող կեցավայրին, վնասվել են մի քանի շինություններ:

Լիբիայի ղեկավարության մամուլի քարտուղարությունը պնդում է, որ ռմբակոծումների նպատակը Մուամար Քադաֆիի ֆիզիկական ոչնչացումն է: Իսկ Մեծ Բրիտանիայի պաշտպանության նախարար Լիամ Ֆոքսը հայտարարել է, որ Քադաֆին «նման հարձակումների լեգիտիմ թիրախն է»: