Սողանքի հետեւանքով վնասվել էին ճանապարհն ու ջրագիծը

Երեկ Տավուշի մարզում սողանքի հետևանքով վնասվել են Իջևան-Ներքին Ծաղկավան ավտոճանապարհը (դարձել է միակողմանի երթևեկելի) և գյուղը սնուցող խմելու ջրի ջրագիծը:

Ինչպես տեղեկացնում է «Արտակարգ ալիքը», դեպքի վայր են մեկնել մարզային փրկարական վարչության փրկարական ջոկատը եւ օպերատիվ խումբը:

Պարզվել է, որ սողանքի հետևանքով փլուզվել է Իջևան-Նոյեմբերյան ավտոճանապարհից դեպի Ներքին Ծաղկավան գյուղ տանող ավտոճանապարհի առաջին կիլոմետրի 30 մ երկարությամբ, 15 մ լայնությամբ և 20 մ խորությամբ հատվածը: Քարերը թափվել են գյուղը սնուցող խմելու ջրի խողովակաշարի վրա և վնասել 30 մ երկարությամբ հատված: Պարզվել է, որ վտանգ է սպառնում նաև ներքևում գտնվող գազատար խողովակին:

Ներկայումս գյուղի ջրամատակարարումը վերականգնվել է: