Կանցկացվի երիտասարդ գրականագետների նստաշրջան

Ապրիլի 11-12-ը ՀՀ ԳԱԱ Մ. Աբեղյանի գրականության ինստիտուտում կանցկացվի Երիտասարդ գրականագետների հանրապետական գիտական նստաշրջան, որին մասնակցում է շուրջ 26 գրականագետ, այդ թվում` մարզերից:

Ըստ Գրականության ինստիտուտի փոխտնօրեն Վարդան Դեւրիկյանի` գիտաժողովը կարեւոր է այնքանով, որ ասպիրանտներին հնարավորություն է տրվում պաշտպանությունից առաջ հոգեբանորեն պատրաստվել: Դեւրիկյանը փաստում է նաեւ, որ թեմաները բազմաժանր են, ինչը բացառում է զեկույցի ընթացքում ձանձրանալ:

Տարբեր են նաեւ մասնակիցները: «Օրինակ` Արքմենիկ Նիկողոսյանը` որպես գրականագետ, արդեն հայտնի անուն է գրական դաշտում, եւ գուցե ինքը կարիք չունենար էլ մասնակցելու գիտաժողովին, բայց մենք ցանկացանք, որ նա մասնակցի, քանի որ կարծում ենք, որ մասնակիցների մեջ էլ պետք է յուրօրինակ սերնդաբաժանում լինի»,-ասաց պարոն Դեւրիկյանը:

Զեկույցներից հետո լինելու են քննարկումներ, իսկ լավագույն զեկույցները տպագրվելու են: