Սոտքում ստուգումներ չեն կատարվել

ՀՀ բնապահպանության նախարարության բնապահպանական պետական տեսչությունը GeoProMining ընկերության` Հայաստանում 4-ամյա գործունեության ընթացքում ոչ մի ստուգում չի անցկացրել. ասված է նախարարության աշխատակազմի ղեկավար Էդգար Փիրումյանի` «ԷկոԼուր»-ին ուղղված պատասխան նամակում:

Հարցումը վերաբերում էր Սոտքում մանրող-ջարդող սարքի տեղադրմանը, որը հակասում է «Սեւանա լճի մասին» ՀՀ օրենքի` Սեւանի ավազանում վերամշակման գործունեություն արգելող 10-րդ հոդվածին:

Թեեւ ընկերությանը 2009-ին ամենաբարձր մակարդակով արգելվեց Սոտքում ոսկու հարստացման գործարան կառուցել, այնուամենայնիվ, 2011թ. փետրվարին ընկերությունը սկսեց իրականացնել իր մտադրության առաջին փուլը` հանքանյութի մանրացման եւ առանձնացման սարքի տեղադրումը:

Սոտքի հանքավայրի բաց եղանակով շահագործելու հետեւանքով տասնյակ հազարավոր տոննա լցակույտեր են գոյացել, որոնք պարունակում են թունավորության առաջին դասի, ինչպես նաեւ ռադիոակտիվ տարրեր:

«Էկոլուրը» հույս է հայտնում, որ բնապահպանության նախարարությունը կարձագանքի իրենց ահազանգին եւ համապատասխան միջոցառումներ կձեռնարկի: