168 ԺԱՄ. Վարչապետի աշունը

Արդեն մի քանի օր է` քաղաքական կուլիսներում խոսում են առաջիկայում սպասվող նոր, ավելի լայնամասշտաբ փոփոխությունների մասին, որոնք դառնալու են խորհրդարանական ընտրություններից առաջ իշխանությունների նախընտրական պլատֆորմի հիմքը:

Մասնավորապես` համառորեն քննարկվում է այն սցենարը, որ առաջիկա մայիսին պաշտոնանկ է արվելու ՀՀ վարչապետ Տիգրան Սարգսյանը:

Ըստ իշխանական աղբյուրների` դրա վերաբերյալ որոշումն արդեն կայացված է:

Հիշեցնենք, որ կառավարության անդամների հետ վերջին հայտնի հանդիպման ժամանակ ՀՀ նախագահ Սերժ Սարգսյանը հրապարակավ հանդիմանեց Տիգրան Սարգսյանին` ըստ էության մեղադրելով երկրում ստեղծված սոցիալական վիճակի, գնաճի եւ այլ բացասական երեւույթների համար:

Ս. Սարգսյանը վարչապետի առջեւ նաեւ ժամկետ սահմանեց` մինչեւ մայիս ամիս քայլեր ձեռնարկել գնաճը կանխելու եւ սոցիալական վիճակը մեղմացնելու ուղղությամբ: Եւ այդ խորհրդակցության պահին, եւ առավել եւս այսօր ակնհայտ է, որ ոչ կառավարությունն ամբողջությամբ վերցրած, եւ ոչ էլ մասնավորապես Տ. Սարգսյանը չեն կարող լուծել այն խնդիրը, որն իրակնում կապված է Հայաստանի ողջ տնտեսական համակարգի, մենաշնորհների, ստվերային եւ հովանավորյալ տնտեսության հետ:

Հետեւաբար, ըստ լուրերի` մայիսին Տիգրան Սարգսյանը հեռացվելու է վարչապետի պաշտոնից: Մեր տեղեկություններով, վարչապետի պաշտոնում նշանակվելու է ԱԺ ներկայիս նախագահ Հովիկ Աբրահամյանը: