Խոչընդոտողը Հայաստանն է

Հայ-վրացական սահմանին ահավոր հերթ է. ամեն մարդ մոտավորապես մեկուկեսից երեք ժամ պետք է սպասի, որպեսզի կարողանա հատել ՀՀ սահմանը. անդրադառնալով Հայաստան-Վրաստան սահմանի հետ կապված խնդիրներին` այսօր ասաց «Ա-ինֆո» միության նախագահ Արտակ Գաբրիելյանը:

Նրա խոսքերով` պատահական մարդկանց համար Վրաստանի սահմանը հատելը տեւում է ընդամենը 2-3 րոպե, «անգամ մեքենայից չեն իջնում, իսկ ՀՀ-ում մի ահավոր խառնաշփոթ իրավիճակ է»: Գաբրիելյանը հատկապես իր դժգոհությունը հայտնեց պարտադիր ապահովագրության վերաբերյալ:

«Ենթադրենք, վաղը մյուս օրը Վրաստանն էլ մի օրենք մտցնի, որ այնտեղ էլ է գործելու պարտադիր ապահովագրություն, ջավախքցին ի՞նչ պետք է անի, ամեն օր մեքենա՞ ապահովագրի, երբ իրենց ընտանիքների մի մասը Հայաստանում է ապրում, եւ այդ մարդիկ ամեն օր կապի մեջ են: Եթե այսօրվա դրությամբ այդ գնալ-գալը խոչընդոտվում է մայր հայրենիքի կողմից, արդեն իսկապես ժողովրդի մոտ անվստահության մթնոլորտ է ձեւավորվում հայրենիքի նկատմամբ»,- նշեց նա: