Սիրահարված են Բաշարին

Երեկ Սիրիայի մի շարք քաղաքների, այդ թվում` Դամասկոսի, Հալեպի եւ Համայի փողոցները դարձյալ լեցուն են եղել ցուցարարներով: Այս անգամ փողոց են դուրս եկել նախագահ Բաշար ալ Ասադի կողմնակիցները: Լսվել են «Ժողովուրդն Ասադի հետ է», «Աստված, Սիրիա, Բաշար եւ վերջ», «Խռովարարներին` ոչ» եւ այլ բացականչություններ:

Ըստ սիրիական պետական հեռուստաընկերության` որոշ կանայք իրենց վրա գրել են` «Սիրահարված ենք Բաշարին»: Ցուցարարներից ոմանք էլ նշել են, որ տեղի ունեցած բախումները «թակարդ են»` ուղղված Սիրիայի միասնականությունը կոտրելուն:

Հիշեցնենք, որ նախագահ Ասադը մի քանի օր շարունակվող բողոքի ակցիաները մեղմելու նպատակով մի շարք  ժողովրդավարական բարեփոխումներ է իրականացրել: Նա երեկ ընդունել է կառավարության հրաժարականը, եւ ակնկալվում է, որ նոր կառավարության ձեւավորման ընթացքում հաշվի կառնվեն նաեւ ցուցարարների պահանջները: