Հայաստանը եւ Իրանը զարգացնելու են համագործակցությունը

Իրանն ու Հայաստանը համաձայնության են եկել արդյունաբերության բնագավառում երկկողմ համագործակցության վերաբերյալ. տեղեկացնում է իրանական Press TV արբանյակային ալիքը:

Երեկ Իրանի արդյունաբերության եւ ընդերքի փոխնախարար Ահմադ Խադեմոլմելլեհը եւ Իրանում Հայաստանի դեսպան Գրիգոր Առաքելյանը քննարկել են երկու երկրների արդյունաբերական ոլորտների հեռանկարները:

Փոխնախարարն ընդգծել է Հայաստանը եւ Իրանը այդ բնագավառում համագործակցության զարգացման մեծ ներուժ ունեն եւ կոչ է արել կազմակերպել գործարարների փոխայցելություններ:

Հայաստանի դեսպանն, իր հերթին,  հավաստիացրել է, որ Հայաստանը պատրաստ է նման համագործակցության: Նրա տվյալներով` երկկողմ ապրանքաշրջանառությունը  270 միլիոն դոլար է եւ դեռ ավելանալու միտում ունի: