ԿԱՊԻՏԱԼ. Ձուն կարող է թանկանալ

Ցորենի գնի աճի միտման պահպանման պայմաններում չի բացառվում հավի ձվի նոր թանկացում։ Լուսակերտի տոհմային թռչնաբուծական ֆաբրիկայի (ԼՏԹՖ) տնօրեն Մանասե Եփրեմյանը նախօրեին «ԱրմԻնֆո» գործակալությանն ասել է, որ այսօր 1 տոննա ցորենի գինը կազմում է 500 դոլար, այնինչ անցած տարի գինը կազմում էր 270-280 դոլար։

«Եթե այդ տենդենցը պահպանվի, ապա ինչ-որ պահից սկսած՝ ենթադրվում է գների նոր աճ։ Այստեղ գները կաճեն անկախ մեզանից՝ ամեն ինչ կախված է լինելու շուկայից»,- ասել է Եփրեմյանը։

Նշենք, որ գյուղատնտեսության նախարար Սերգո Կարապետյանը օրերս կայացած ասուլիսին ասել էր, որ, հունվարի հետ համեմատած, այս ամիս արդեն ձվի գնի նվազում է նկատվել, ու չի բացառվում, որ նույնիսկ այդ ապրանքատեսակի գնի անկում գրանցվի: