Իրանը վարակվել է հեղափոխության հարուցիչով

Մահրիբյան պետություններով անցած զանգվածային անկարգությունների ալիքը հասել է մինչեւ Իրան: Թեհրանում եւ երկրի մի շարք քաղաքներում փետրվարի 14-ին տեղի են ունեցել բողոքի բազմահազարանոց ցույցեր:

Ընդդիմության հազարավոր կողմնակիցներ դուրս են եկել Իրանի մայրաքաղաքի փողոցներ՝ պահանջելով նախագահի հրաժարականը եւ ժողովրդավարական բարեփոխումների անցկացում:

Ոստիկանները ցուցարարներին ցրել են արցունաքաբեր գազի օգնությամբ: Լրատվամիջոցների վերջին տեղեկություններով` մեկ մարդ զոհվել է, տասնյակ ցուցարարներ վնասվածքներ են ստացել, ավելի քան 200 հոգի ձերբակալվել է:

Ներկայումս Թեհրանում անվտանգության միջոցառումներ են իրականացվում: Արգելափակված է ինտերնետը, անջատված է բջջային կապը, արտասահմանյան թղթակիցներին արգելված է աշխատել փողոցներում, փորձեր են արվում դադարեցնել արբանյակային հեռուստաալիքների հեռարձակումը:

ԱՄՆ պետքարտուղար Հիլարի Քլինթոնը աջակցություն է հայտնել ընդդիմադիրներին եւ Իրանի իշխանություններին կոչ է արել ականջալուր լինել ընդդիմությանը եւ գնալ ժողովրդավարական վերափոխումների ճանապարհով: