Ձայնասկավառակի գովազդը` առաջին տիկնոջից

Շուտով հայկական շուկայում կհայտնվի երգահան Արթուր Գրիգորյանի «Երկու տուն, մեկ անուն հայրենիք» ձայնասկավառակը, որի շնորհանդեսը տեղի է ունեցել այսօր` Երգի պետական թատրոնում:

Երգահանի հյուրերն էին Հայաստանի առաջին տիկին Ռիտա Սարգսյանը, մշակույթի նախարար Հասմիկ Պողոսյանը, հայ էստրադայի գրեթե բոլոր ներկայացուցիչները... Ձայնասկավառակը ձեռք բերելու համար կա’մ պետք է լրագրող լինեիր, կա’մ երկու հազար դրամ ունենայիր:

Ձայնասկավառակ ստեղծելու գաղափարը Արթուր Գրիգորյանի դստեր` Մանե Գրիգորյանինն է. «Հայրիկը նման բաներ չի սիրում` շնորհանդես, ձայնասկավառակի մակագրություն... Երբ պետք է ձայնասկավառակի համար նրան նկարեինք, զարմացավ, թե տանը եղած նկարներից ինչու չենք դնում»:

Մանեն համոզել էր, որ հայրը ձայնասկավառակների վրա ստորագրի, բայց մի մասն էլի ինքն էր մակագրում: Իսկ Ռիտա Սարգսյանի ձայնասկավառակին Արթուր Գրիգորյանի մակագրությունն է. լրատվամիջոցների ֆոտոխցիկների օբյեկտիվներն են վկա: