ԿԱՊԻՏԱԼ. Արծվիկ Մինասյան. Եթե կառավարությունն ու ԿԲ-ն ընդհանրապես չգործեն, շատ լավ վիճակում կլինենք

Գնաճի զսպման այն մոդելը, որ կա Հայաստանում, ակնհայտորեն չի արդարացնում իրեն: Հիմնախնդիրները կապված են ոչ միայն մեր տնտեսության կառուցվածքի եւ որակական զարգացումների, այլեւ վարվող պետական քաղաքականության հետ: Երեկ լրագրողների հետ հանդիպմանը նման տեսակետ է հայտնել ԱԺ պատգամավոր, ՀՅԴ անդամ Արծվիկ Մինասյանը:

«ՀՀ Սահմանադրությամբ՝ գնաճի զսպման քաղաքականությունը թեեւ դրված է Կենտրոնական բանկի վրա, սակայն այն` իր այսօրվա գործիքակազմով եւ որդեգրած քաղաքականությամբ, ի վիճակի չէ ամբողջ տնտեսությունում այնպիսի փոփոխություններ իրականացնել, որոնք կբերեն գների մակարդակի արդյունավետ կարգավորման»,- ասել է Ա. Մինասյանը: