Փողոցային առեւտուրը բնակչության մեծ մասի ապրուստի միակ միջոց

Այսօր Երեւանի քաղաքապետարանի մոտ կրկին բողոքի ակցիա են անցկացրել  փողոցային առեւտրով զբաղվող տասնյակ անհատ ձեռներեցներ: Փողոցային առեւտուրն իրենց ապրուստի միակ միջոցը համարող ցուցարարները պահանջել են քաղաքապետի հետ հանդիպում։ Քաղաքապետի փոխարեն` ցուցարարների հետ զրույցի փորձեր են կատարել քաղաքապետարանի այլ աշխատակիցներ, սակայն ապարդյուն:

Ինչպես ԵՐԿԻՐ-ի հետ զրույցում տեղեկացրին տեղեկատվության եւ հասարակայնության հետ կապերի վարչությունից, քաղաքապետի նպատակը ամենեւին էլ առեւտուրը արգելելը չէ, այլ քաղաքակիրթ առեւտրի կանոններ սահմանելը: Քաղաքապետարանը առաջարկում է նրանց տեղափոխվել մոտակա շուկաներ, այնտեղ զբաղեցնել տաղավարներ: Տեղեկատվության վարչության փոխանցմամբ` քաղաքապետարանը արդեն պայմանագրեր է կնքել շուկաների հետ, փորձել լուծել դրանց գների հետ կապված խնդիրները: Որոշ տաղավարներ էլ նույնիսկ տրամադրվելու են անվճար: Եթե առկա շուկաների տաղավարները չբավականացնեն, ապա քաղաքապետարանը խոստանում է լրացուցիչ փոքրածավալ շուկաներ: