Լրտեսության մեղադրանքով սպա է ձերբակալվել

Ռուսաստանի անվտանգության դաշնային ծառայությունը ձերբակալել է Հարավային զինվորական շրջանի զորամասերից մեկում ծառայող մի սպայի եւ նրա մորը` Վրաստանի օգտին լրտեսություն անելու մեղադրանքով:

Այս մասին այսօր հաղորդագրություն է տարածել Անվտանգության դաշնային ծառայության հասարակայնության հետ կապերի կենտրոնը:

«Անվտանգության դաշնային ծառայության մարմինները պետությանը դավաճանելու կասկածանքով ձերբակալել են Ռուսաստանի քաղաքացու: Հարավային շրջանի զորամասերից մեկի զինծառայող, ավագ լեյտենանտ Դավիդ Ալիեւը վրացական հատուկ ծառայությունների հանձնարարությամբ գաղտնի ինֆորմացիա է հավաքել շրջանի զորքերի մասին:

Իսկ նրա մայրը` Իրինա Ալիեւան, ցանկացել է որդու կողմից հավաքագրված ինֆորմացիան տեղափոխել Վրաստան»,- գրված է հաղորդագրությունում:

Երկուսի դեմ արդեն իսկ մեղադրանք է առաջադրվել` պետական դավաճանության` լրտեսության համար: Այս մասին հաղորդում է РИА «Новости»-ն: