Աբովյանի մանկապարտեզները փակվել են չջեռուցվելու պատճառո՞վ

Աբովյան քաղաքում լուրեր են շրջանառվում, որ քաղաքի թվով 9 մանկապարտեզները դեկտեմբերի 25-ից անորոշ ժամանակով փակվել են, քանի որ քաղաքապետ Կարո Գուլոյանը չի ցանկանում գումար հատկացնել ջեռուցման համար:

Թե որքանո՞վ են հավաստի այդ տեղեկությունները, փորձեցինք պարզել Աբովյանի քաղաքապետի օգնական Մանուկ Հակոբյանից: Նա նշեց, որ Աբովյանի քաղաքապետարանի ենթակայության տակ գտնվող այն հաստատությունները, որտեղ երեխաներ են սովորում` մանկապարտեզներ, երաժշտական, շախմատի դպրոցներ եւ այլն, փակվել են քաղաքապետի կարգադրությամբ` հունվար ամսին բնորոշ գրիպի համաճարակը կանխելու նպատակով: «Հավաստիացնում եմ, որ դեկտեմբերի 25-ին փակված այդ հիմնարկները փետրվարի 1-ին կվերաբացվեն ու կշարունակեն կանոնավոր գործել: Ժողովրդի շրջանում տարածված բոլոր այն լուրերը, որ քաղաքապետը չի ցանկանում ջեռուցել այդ հիմնարկները, ես համարում եմ ստահոդ ու անհիմն»,- ԵՐԿԻՐ-ին ասաց  Մանուկ Հակոբյանը: