Օրինագծի քվեարկությունը տապալվեց

Ազգային ժողովի արտահերթ նիստում վերջնական` երկրորդ ընթերցմամբ քննարկված «Շրջակա միջավայրի վրա ազդեցության փորձաքննության մասին» օրենքում լրացում կատարելու մասին նախագծի քվեարկությունը տապալվեց: Կառավարության օրենսդրական այս վիճահարույց նախաձեռնության քվեարկությանը չմասնակցեցին անհրաժեշտ թվով` առնվազն 66 պատգամավորներ, ուստի քվեարկությունը համարվեց չկայացած, իսկ նախագիծը` չընդունված:

«Նոյյան Տապանի» փոխանցմամաբ, մերժված լրացմամբ առաջարկվում էր քաղաքաշինության ոլորտում նախատեսվող գործունեության փորձաքննության իրականացման համար ժամկետ սահմանել առավելագույնը 30 օր` գործող օրենքով նախատեսված 120-օրյա ժամկետի փոխարեն: Այդ ժամկետում լիազորված մարմնի կողմից պատաuխան չտալու դեպքում փորձաքննական եզրակացությունը պետք է համարվեր դրական:

Կառավարության հիմնավորմամբ, նախագծի նպատակն էր, ելնելով գործարար միջավայրի բարելավման անհրաժեշտությունից, պարզեցնել քաղաքաշինական գործունեության իրականացման համար օրենքով պահանջվող փորձաքննության իրականացման ընթացակարգը:

Օրենսդրական այս փոփոխությանը հիմնականում դեմ էր խորհրդարանական ընդդիմությունը: Ըստ «Ժառանգության», օրինագիծն ուղղված է մի խումբ մարդկանց` «հնարավորություն ընձեռնելով վայրագ ասպատակություն կատարելու կանաչ տարածքների նկատմամբ»:

Փոփոխությանը դեմ էին արտահայտվել նաեւ մի շարք բնապահպան կազմակերպություններ: