Նոր սեպտեմբեր 11՝ ԱՄՆ դիվանագիտության համար

WikiLeaks-ի  ԱՄՆ Պետդեպարտամենտի գաղտնի փաստաթղթերի հրապարակումը Իտալիայի արտգործնախարարությունը անվանել է «խոշոր ահաբեկություն համաշխարհային դիվանագիտության դեմ»:

Այս մասին, ըստ «Ռոյթեր» գործակալության, հայտարարել է Իտալիայի արտգործնախարար Ֆրանկո Ֆրատինին: Իտալիայի արտաքին գերատեսչության ղեկավարի խոսքով, այս միջադեպը համարժեք է «Սեպտեմբերի 11»-ին: Ֆրատինիի համոզմամբ, սկանդալային այս հրապարակումներից հետո պետությունների միջև վստահությունը կկորի: Նրա խոսքով, WikiLeaks-ի հրապարակած տվյալները նյութ են կրիմինալ հանցագործությունների, որոնց դեմ 10 երկրներում արդեն հարուցվել են քրեական գործեր: Նա կոչ է արել իր երկրի իրավապահներին քննություն սկսել WikiLeaks-ի հրապարակած փաստերի ստուգման ուղղությամբ:

«Ռոյթեր» գործակալությունը միաժամանակ նշում է, որ WikiLeaks-ի սկանդալային հրապարակումները ամերիկյան դիվանագիտության համար նոր «Սեպտեմբերի 11» են նախանշում: