close
Եղանակը Երևանում
17 Մայիսի 2022
+16°
+27°Ցերեկ
+15°Գիշեր
weather
close
Փոխարժեք
17 Մայ 2022
USD1486.54
GBP1613.24
EUR1550.71
RUB16.86
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Ձեռքով մակագրումը վտանգում է դատական իշխանության ներքին անկախությունը․ Ալվինա Գյուլումյան

Իրավունք

11 Հունվարի 2022, 12:15
 Ձեռքով մակագրումը վտանգում է դատական իշխանության ներքին անկախությունը․ Ալվինա Գյուլումյան

Երբ մակագրությունը կատարվում է դատարանի նախագահի կողմից՝ գործ ունենք դատական իշխանության ներսում անկախության խնդրի հետ՝ Yerkir.am-ի հետ հարցազրույցում ասաց Սահմանադրական դատարանի նախկին դատավոր Ալվինա Գյուլումյանը՝ խոսելով արդեն մի քանի ամիս շարունակվող պրակտիկայի մասին, երբ Երևանի բոլոր դատարաններում ոչ թե համակարգիչն է պատահականության սկզբունքով ընտրում՝ որ գործը որ դատավորը քննի, այլ դատարանի նախագահը գործերը ձեռքով մակագրում է այս կամ այն դատավորին։

Խնդիրն առաջացավ այն բանից հետո, երբ ԱԱԾ-ն դեռ հուլիսին առգրավեց գործերը մակագրող համակարգիչն ու սերվերը և մինչև այսօր չի վերադարձրել, ոչ էլ փոխարինող նոր սերվեր է ձեռք բերվել։ Մասնագիտական շրջանակները մտավախություն ունեն, որ դա արվել է միտումնավոր՝ քաղաքական ենթատեքստ ունեցող դատական գործերով իշխանությունների համար ցանկալի որոշումներ ունենալու համար։

«Վտանգված է դատական իշխանության ներքին անկախությունը, այսինքն, դատարանի նախագահի կամքից է արդեն կախված դառնում՝ ո՛ր դատավորը ո՛ր գործը քննի»,-ասաց Ալվինա Գյուլումյանը։  

Նա արձանագրեց, որ այստեղ խնդիրը բոլոր գործերը չեն, այլ կան առանձին գործեր, որոնք առավել զգայուն են, դրանց մասին է խոսքը։

«Ես չեմ կասկածում, ես ուղղակի ասում եմ, թե դրանք ինչ վտանգներ են իրենց մեջ պարունակում»,-ասաց նախկին դատավորը։

Նա չբացառեց, որ այս պարագայում գործերի քննությունը վերահսկելի կարող է դառնալ իշխանությունների կողմից։

«Եթե դատարանի նախագահն է մակագրում, պետք է ինքն արդեն որոշած լինի, թե որ դատավորն է քննելու, այսինքն, օբյեկտիվ չափորոշիչներ չեն գործում տվյալ դեպքում, և գործ ունենք դատական իշխանության ներսում դատավորների անաչառության հետ»,-փաստեց Ալվինա Գյուլումյանը։

Մի խումբ դատավորներ այս օրերին հայտարարությամբ են հանդես եկել, որով մտահոգություն են հայտնում, որ Արդարադատության նախարարը չարաշահում է կարգապահական վարույթներ հարուցելու՝ իր լիազորությունը։

Սահմանադրական դատարանի նախկին դատավորը նշեց, որ այս դեպքում, ընդհանրապես, գործ ունենք դատական իշխանության անկախության նկատմամբ որոշակի ռիսկերի հետ։

«Այստեղ էլ գործ ունենք դատական իշխանության հանդեպ մեկ այլ իշխանության միջամտության հետ»,-ասաց Ալվինա Գյուլումյանը։

Երկու պարագան էլ նախկին դատավորը խիստ բացասական գնահատեց։

Աննա Բալյան

Տես նաև «Երբ որևէ անձ որոշում է, թե գործով ով պետք է լինի դատավոր՝ սուբյեկտիվ միջամտությունն ակնհայտ է և ունենք հետընթաց․ Արսեն Սարդարյան»։

Այս բաժնի այլ նորությունները
Ամենաշատ ընթերցվածները
Yandex.Metrica