close
Եղանակը Երևանում
28 Մարտի 2020
+15°
+16°Ցերեկ
+6°Գիշեր
weather
close
Փոխարժեք
28 Մար 2020
USD1498.43
GBP1608.88
EUR1548.22
RUB16.40
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Արդյո՞ք Ստեփանակերտի մթերային շուկայում գնաճ ու սղություն է նկատվում

Արցախ

19 Մարտի 2020, 20:43
 Արդյո՞ք Ստեփանակերտի մթերային շուկայում գնաճ ու սղություն է նկատվում

Ստեփանակերտում շրջանառվող լուրերի համաձայն՝ մեծածախ առևտրի կետերում մթերային որոշ ապրանքատեսակների սղություն և գնաճ է նկատվում:

Իրողությունը պարզելու նպատակով «Ապառաժ»-ը շրջայցով եղել է մայրաքաղաքի մեծածախ առևտրի մի շարք կետերում: Մասնավորապես, Հեքիմյան փողոցում տեղակայված մեծածախ առևտրի կետերում կատարած դիտարկումների արդյունքում պարզվեց, որ սովորականի համեմատ կտրուկ աճել են ձավարեղենի, ալյուրի, շաքարավազի և ձեթի գնումների ծավալները:

Որոշ առևտրի կետերի վաճառող-վաճառողուհիներն ու պատասխանատուները մեզ հետ զրույցում բնակչության գնումների ներկայիս եռուզեռն ու առևտրաշրջանառության ծավալները համեմատում են ամանորյա ժամանակահատվածի հետ: Մեծամասամբ գերադասում են՝ մասնավորապես ձավարեղենը, ալյուրն ու շաքարավազը գնել մեծ ու փոքր պարկերով:

Մեծածախ առևտրի կետերից մեկի պատասխանատու Արմեն Անտոնյանն իր խոսքում նշեց, որ չնայած սննդամթերքի այդ տեսականու պահանջարկի ու գնումների կտրուկ ավելացումը շուկայում որոշակի սղություն է առաջացրել, այդուհանդերձ մատակարարումը կատարվում է ժամանակին ու անհրաժեշտ ծավալներով: Մեր զրուցակցի հաղորդմամբ՝ վաղը կմեկնեն Երևան պահանջված սննդամթերքի մատակարարման նպատակով:

Ի դեպ, մեր այցի պահին այս առևտրի կետում արդեն ընդունել էին ալյուրով բեռնված առաջին բեռնատարը: Պահեստում նույնպես ալյուրի պարկերի պակաս չէր զգացվում: Ինչ վերաբերում է գնաճին, ապա Արմեն Անտոնյանը տեղեկացրեց, որ նախկինի համեմատ 200 դրամով թանկացել է մեկ պարկ ալյուրի գինը: Գնաճը մեր զրուցակիցը պայմանավորում է դոլարի փոխարժեքի բարձրացմամբ:

Երևանից ներկայումս մատակարարվող ձեթի այն տեսականու պարագայում, որը խոշոր մատակարարները դոլարով են ձեռքբերում, 10-20 դրամով գնաճ է նկատվում: Մեծածախ առևտրի կետերի պատասխանատուները մեզ հետ զրույցում վստահեցրին, որ նախկինում ստացած խմբաքանակի ու ռուսական արտադրության ձեթի իրացումը նույն գներով է, ինչպես նախկինում:

Ավելի քան 4 մեծածախ առևտրի կետերում դիտարկումները ցույց տվեցին, որ մեկ պարկ ալյուրի 200 դրամով թանկացումը վերաբերում է նաև մյուսներին: Ընդհանուր առմամբ, 10-20 դրամով թանկացել են ձավարեղենը, շաքարավազը, մասամբ՝ նաև ձեթը: Մայրաքաղաքի Մ. Մաշտոց փողոցում տեղակայված մեծածախ առևտրի կետում սպառվել էին հնդկացորենը, շաքարավազը: Առկա և ալյուրի, և

ձեթի պաշարներն առայժմ բավականացնում են պահանջարկը բավարարելու համար: Ըստ վաճառողի՝ այսօր և վաղը սպասում են մեծ պահանջարկ ունեցող սննդամթերքի մատակարարմանը: Ի տարբերություն Հեքիմյան փողոցի մեծածախ առևտրի կետերի, որտեղ ձեթի միջին գինը 700 դրամ է կազմում, այստեղ ձեթը վաճառվում է 710-800 դրամով: Բավականին թանկացել է ոսպը՝ կազմելով 600 դրամ:

«Կապիտալ» խանութների ցանցի մթերային առևտրի կետերից մեկում մեր կատարած դիտարկումից պարզվեց, որ ձավարեղենի և ձեթի տեսականու պակաս չի զգացվում: Խանութի պատասխանատուն տեղեկացրեց, որ գնումների ծավալի համեմատական աճ 2 օրով է գրանցվել: Այստեղ առկա ձեթի և ձավարեղենի տեսականու նախկինում ստացած խմբաքանակներն առայժմ չեն սպառվել, ուստի գնաճ ևս չի եղել: Այդուհանդերձ, մեր զրուցակիցը չբացառեց, որ դոլարի փոխարժեքի բարձրացումն առաջիկայում մատակարարվելիք մթերային ապրանքների գնաճի վրա ազդեցություն կունենա:

Նշենք նաև, որ մեր այցի պահին այս մթերային խանութում էին նաև ԱՀ էկոնոմիկայի և արտադրական ենթակառուցվածքների նախարարության ներկայացուցիչները՝ ապրանքների մատակարարման հետ կապված իրավիճակը պարզելու նպատակով:

Վան Նովիկով

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica