close
Եղանակը Երևանում
11 Օգոստոսի 2020
+18°
+29°Ցերեկ
+17°Գիշեր
weather
close
Փոխարժեք
11 Օգս 2020
USD1486.54
GBP1613.24
EUR1550.71
RUB16.86
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

ՍԴՀԿ-ՀՅԴ-ՌԱԿ Միջկուսակցական Ժողով

Քաղաքական

27 Փետրվարի 2020, 13:30
 ՍԴՀԿ-ՀՅԴ-ՌԱԿ Միջկուսակցական Ժողով

Երէկ, չորեքշաբթի, 26 փետրուարին, Սոցիալ դեմոկրատ Հնչակեան կուսակցութեան Նոր Հաճնոյ գրասենեակին մէջ տեղի ունեցաւ միջկուսակցական հանդիպում մը` ՍԴՀԿ-ի, ՀՅԴ-ի եւ ՌԱԿ-ի միջեւ: Ներկայ էին ՍԴՀԿ-էն` ատենապետ Սեպուհ Գալփաքեան, Մարտիկ Ժամկոչեան, ՀՅԴ-էն` ներկայացուցիչ, երեսփոխան Յակոբ Բագրատունի, Յակոբ Հաւաթեան, Մելիք Գարագաւորեան եւ ՌԱԿ-էն` ատենապետ Սեւակ Յակոբեան եւ Արմէն Վայեճեան:

Ժողովականները քննարկեցին լիբանանեան քաղաքական բեմին վրայ տեղի ունեցած վերջին զարգացումները, ստեղծուած տնտեսական ճգնաժամը, ինչպէս նաեւ լիբանանահայութեան առջեւ ծառացած կրթական, ընկերային եւ տնտեսական զանազան խնդիրներն ու տագնապները:

Քննարկելով քաղաքական օրակարգը` ժողովականները արդարացի համարեցին 17 հոկտեմբերին ծայր առած ժողովրդային բողոքներն ու պոռթկումները եւ նշեցին, որ տագնապէն դուրս գալու միջոցներ կը շարունակեն մնալ կողմերուն միջեւ երկխօսութիւնը, կառավարութեան կողմէ ուսումնասիրուած տնտեսական ծրագիրի մը գործադրութիւնը, ինչպէս նաեւ պետական համակարգին մէջ փտածութեան վերացումը եւ յափշտակուած գումարներու վերադարձը պետական գանձարկղ` դատաիրաւական անկախ համակարգի մը ստեղծումով:

Ժողովականները շեշտեցին, որ Լիբանան հեռու պէտք է պահել արտաքին ամէն տեսակի միջամտութիւններէ եւ ապատեղեկատուութեան ու խեղաթիւրումներու վրայ հիմնուած խուճապային մթնոլորտէ: Փաստը ցոյց տուած է, որ բեւեռացումը երբեք չի նպաստեր ներկայ առաջադրանքներու իրականացման, այլ ընդհակառակն` աւելի կը ծանրացնէ առկայ վատ կացութիւնը:

Իսկ ազգային օրակարգով, որպէսզի ստեղծուած տնտեսական տագնապը չունենայ սուր հետեւանքներ, կենսական նկատուեցաւ, որ համայնքի կազմակերպութիւնները եւ կառոյցները առաւելագոյն դիւրութիւններ ընծայեն համայնքի զաւակներուն եւ զարկ տան ընկերային ու բարեսիրական օժանդակութիւններուն` թեթեւցնելու համար քաղաքայիններուն կրած տնտեսական, կենցաղային, առողջապահական ու ապրուստի ծանր բեռը:

Այս ծիրին մէջ անհրաժեշտ նկատուեցաւ ներկայ փուլին անխախտ պահել լիբանանահայութեան անվտանգութիւնն ու միասնակամութիւնը եւ ճիգ չխնայել երաշխաւորելու լիբանանահայ համայնքի կենսունակութիւնը եւ անոր պատմական դերակատարութեան շարունակականութիւնը:

Միջկուսակցական ժողովը անդրադարձաւ նաեւ պատմութեան ընթացքին Լիբանանի հանդէպ մի՛շտ ալ թշնամական վերաբերմունք որդեգրած, երկար ժամանակ զայն իր լուծին ենթարկած, զայն սովամահ դարձուցած, ծաւալապաշտ ու ցեղասպան Թուրքիոյ` Լիբանանի նկատմամբ որդեգրած նորօրեայ տխուր վերաբերմունքին, որ կը սպառնայ այս անգամ երկրի կայունութեան ու ապահովութեան: Այս իմաստով անհրաժեշտ նկատուեցաւ ցուցաբերել համալիբանանեան զգաստութիւն եւ խոհեմութիւն:

Ժողովը անդրադարձաւ նաեւ հայաստանեան ու արցախեան վերջին իրադարձութիւններուն: Որոշուեցաւ յառաջիկայ հանդիպումին եզրակացնել Հայոց ցեղասպանութեան 105-ամեակի ոգեկոչման համահայկական ձեռնարկներու մանրամասնութիւնները:

ՍԴՀԿ
ՀՅԴ
ՌԱԿ

aztagdaily.com

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica