close
Եղանակը Երևանում
21 Նոյեմբերի 2019
+0°
+8°Ցերեկ
+0°Գիշեր
weather
close
Փոխարժեք
21 Նմբ 2019
USD1476.69
GBP1617.03
EUR1528.46
RUB17.47
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

ՏՄՊՊՀ-ն պիտի զբաղվի գների միասնական իջեցմամբ՝ նոր խաղացողների մուտքը շուկա ապահովելու համար. տնտեսագետ

Տնտեսական

14 Հոկտեմբերի 2019, 16:05
 ՏՄՊՊՀ-ն պիտի զբաղվի գների միասնական իջեցմամբ՝ նոր խաղացողների մուտքը շուկա ապահովելու համար. տնտեսագետ

Վերջին ամսվա կամ ամիսների ընթացքում մի շարք ապրանքների գներ իջել են, բայց այնպես չէ, որ դա միանշանակ դրական երևույթ է. այսօր՝ հոկտեմբերի 14-ին հրավիրված ասուլիսում նշեց տնտեսագետ, ՀՅԴ փորձագետ Սուրեն Պարսյանը:

«Մի խումբ տնտեսվարողներ, որոնք տարիներ շարունակ գործում են որոշակի ապրանքային շուկայում, միաժամանակ գները բարձրացնում են և միաժամանակ իջեցնում: Միաժամանակ գների իջեցումը ևս խախտում է՝ տնտեսական մրցակցության տեսանկյունից: Նրանք, միաժամանակ գներն իջեցնելով, սահմանափակում կամ խոչընդոտում են նոր տնտեսվարողների ի հայտ գալուն: Եթե գները ցածր են, նոր տնտեսվարողներ չեն կարող մտնել այդ շուկան»,- պարզաբանեց նա:

Գների իջեցումը, տնտեսագետի խոսքով, կարող է լինել ստվերային պայմանավորվածությամբ շուկայում հակամրցակցային պայմաններ ստեղծելու համար, կարող է պայմանավորված լինել դրամի արժևորմամբ (այս տարի այն կազմել է 3 տոկոս), կարող է և պայմանավորված լինել նաև նոր տնտեսվարող սուբյեկտի ի հայտ գալով: «Տնտեսական մրցակցության պաշտպանության հանձնաժողովը պիտի արձագանքի ոչ միայն միասնական գների բարձրացմանը, այլև գների միասնական իջեցմանը: Սա առողջ երևույթ չէ: Սա դրական կողմից է ներկայացվում, բայց բիզնեսի կամ տնտեսվարողների տեսանկյունից չի կարող դրական լինել»,- նշեց նա:

Որպես օրինակ՝ Պարսյանը նշեց շաքարավազի գնանկումը. այն պահին, երբ հնարավորություն տրվեց շաքարավազ ներկրելու, «Ալեքս Գրիգը» գինն իջեցրեց, և արդյունքում՝ շուկայի մասնակիցների թիվը նվազեց: «Շաքարավազի դեպքում մեծ ծավալներ պիտի ապահովես, օրինակ՝ մի քանի հազար տոննա պիտի ներմուծես, որ կարողանաս իրացում ապահովել: Այստեղ ևս դեր ունի մեծածախ-մանրածախ շուկաների տարանջատումը»,- նշեց նա:

Սպառողի համար, ըստ Պարսյանի, թեպետ ժամանակավորապես հաճելի է գնանկում տեսնելը, սակայն միշտ չէ, որ շահավետ է: «2008թ. ձվի գնի կտրուկ իջեցում եղավ՝ հասավ մինչև 10-15 դրամի: Ի՞նչ տեղի ունեցավ: Ձու արտադրող փոքր և միջին ընկերությունները սնանկացան և շուկայից դուրս եկան, սպառողները ուրախացան՝ ինչ լավ է, էժան ձու ունենք երկու-երեք ամիս: Իսկ հիմա 70-80 դրամ է դարձել: Հիմա ո՞րն է լավ. 10-15 դրամ՝ երկու-երեք ամի՞ս, թե՞ ընդհանրապես՝ 50-60 դրամ»,- ասաց նա:

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica