close
Եղանակը Երևանում
19 Նոյեմբերի 2019
-1°
+9°Ցերեկ
-1°Գիշեր
weather
close
Փոխարժեք
19 Նմբ 2019
USD1477.31
GBP1618.74
EUR1528.00
RUB17.48
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

ՀՅԴ Հայաստանի ԳՄ անդամ Արծվիկ Մինասյանը Իրանում է

Հասարակություն

4 Հոկտեմբերի 2019, 17:41
 ՀՅԴ Հայաստանի ԳՄ անդամ Արծվիկ Մինասյանը Իրանում է

ՀՅԴ 129-ամյակի տոնակատարությունների ժամանակ Թեհրանի «Արարատ» կազմակերպության «Կոմիտաս» սրահում, ՀՅԴ Իրանի հյուսիսային շրջանի Կենտրոնական կոմիտեի նախաձեռնությամբ, տեղի է ունեցել հանդիսավոր միջոցառում: Yerkir.am-ի թղթակիցն Իրանից հայտնում է, որ ելույթով հանդես են եկել ՀՅԴ Հայաստանի Գերագույն մարմնի անդամ Արծվիկ Մինասյանն ու Իրանի հյուսիսային շրջանի ՀՅԴ Կենտրոնական կոմիտեի ներկայացուցիչ Սուրիկ Աբնոսյանը:

Ինչո՞ւ ստեղծվեց Դաշնակցությունը, արդյո՞ք հասել է նպատակին և դեպի ո՞ւր է գնում. այս հարցերի պատասխաններն է հնչեցրել ՀՅԴ Հայաստանի  ԳՄ անդամ Արծվիկ Մինասյանը: 

Ըստ նրա՝ ՀՅԴ-ի գոյության 129 տարիներից միայն 30-ն է անցել Հայաստանի՝ պետականություն ունենալու պայմաններում, բայց Դաշնակցությունը շարունակել է մնալ կենսունակ՝ իր  գաղափարաբանությամբ, պատկերացումներով, 129 տարի՝ տարբեր սերունդների՝ նույն նպատակին գնալու գործողություններով: Սա, Մինասյանի համոզմամբ, ապացույց է, որ ոչինչ և ոչ ոք չի կարող պառակտել այն քաղաքական կազմակերպությունը, որի նպատակը հայ ժողովրդի ինքնության հաստատումն է:

Դաշնակցության առաքելությունը, ըստ նրա, յուրաքանչյուր հայի մեջ հայեցիությունը պահելով՝ իրական նպատակի կերտումն է: Մինչդեռ՝ ապազգային մարդկանց, որոնք փորձել են հարվածել Դաշնակցությանը, հանդիպել ենք անկախ հանրապետության կազմավորման առաջին օրվանից:

«1990-ական թվականների այն շրջանը, երբ ապազգայինը, անպետքը, ազգի տականքը որոշել էր, որ Հայաստանը, հայ ժողովուրդը չպետք է ազգային մտածողությամբ ապրի և Հայաստանի անվտանգությունը ձևակերպում էր նրա՝ չպաշտպանված լինելու մեջ, ասում էր՝ մեր պաշտպանությունը մեր անպաշտպանության մեջ է, այս մտածողությունը մերժվեց մեր ժողովրդի կողմից: Սակայն, ցավոք, այսպիսի  երևույթները նորից արմատավորվելու հատկություն ունեն, և այսօր էլ մեզ սպառնում է այդպիսի վիճակ, որովհետև, երբ այս տեսակը սկսում է ազգային մտածողությունը թիրախավորել, մեր ավանդական ընտանեկան արժեքները, եկեղեցին, բանակը, յուրաքանչյուր հայի մեջ նստած հայկականությունը թիրախավորել, սա վտանգավոր երևույթ է, որը սնուցում է ստանում, և ազգի մեջ սկսում են տիրել խանդը, նախանձը և թշնամությունը: Սա սպառնալիք է մեր միասնականությանը»,-ասել է Արծվիկ Մինասյանը:

Մինչդեռ Դաշնակցությունը, նրա խոսքով, հանդես է գալիս սիրո և հանդուրժողականության իրական նպատակների տանող գործողություններ հաստատելու, բանակը ուժեղացնելու, զինվորի հերոսությունը քաջալերելու ճանապարհով: Նրա համոզմամբ՝ Հայաստանի պատմության մեջ որևէ այլ քաղաքական ուժ չկա, որն իր կենսունակությամբ կարող է համեմատվել Դաշնակցության հետ, որովհետև ՀՅԴ-ն ծառի նման սնվում է ազգի արմատներից:

«Դրա համար է, որ կենսունակ ենք և մեր խոսքը՝ 129-ամյա խոսքը, այսօր անհրաժեշտ է, որ օրվա քաղաքական իշխանությունները հասկանան, որ ամեն քաղաքական պաշտոն անցողիկ է, մնայունը ազգն է ու պետականությունը: Եվ եթե որևէ իշխանություն Դաշնակցությանը դիտարկում է որպես օրվա խնդիր լուծող, այդպիսի իշխանությունն ապագա չի ունենում»,- նշել է ՀՅԴ Հայաստանի ԳՄ անդամը:

Նա հիշեցրել է անցյալ տարվա հուժկու ժողովրդական ընդվզումը, որի ժամանակ Հայաստանից մինչև Սփյուռքի գաղթօջախներ ու Արցախ արագ փոփոխությունների պահանջ էին դնում, ինչով պայմանավորված՝ ընտրություններում այսօրվա քաղաքական իշխանությունը բարձր վստահություն ստացավ: «Մեկ ու կես տարին բավարար է՝ հասկանալու՝ ճի՞շտ ուղղությամբ է իշխանությունը գնում, արդյո՞ք այդ որակին էր մեր ժողովուրդը ձգտում, թե՞ մեր ժողովուրդը նորից միամտաբար մեկ անձով է պատկերացնում իր հերոսական ապագայի կերտումը: Շատ վտանգավոր կլինի սա, որովհետև չկա որևէ անձ, որը կարողանա մեր ժողովրդի ամբողջ իդեալը իրացնել: Դրա համար կան պետական իշխանության մարմիններ»,- ընդգծել է Արծվիկ Մինասյանը:

Նրա շեշտել է՝ Հայաստանը պառլամենտական երկիր է, բայց այսօրվա պառլամենտն այն չէ, ինչ մեր ժողովուրդն է պատկերացնում, հակառակ դեպքում՝ չի կարող պառլամենտը մեր ազգային ավանդական արժեքներին դեմ գործողություններ իրականացնել, իսկ պատգամավորն իրեն դրսևորել «մեր դեմ խաղ չկա» կեցվածքով. ուրեմն ինչո՞վ են ներկաները տարբերվում նախորդ ռեժիմներից, որոնց քննադատում էին:

«Իշխող քաղաքական ուժի ղեկավարները պետք է գիտակցեն, որ ժողովրդից ստացած մանդատը իրավունք չունեն մսխելու և, եթե պառլամենտում հայտնվել են բացառապես Նիկոլ Փաշինյանի հեղինակության շնորհիվ, դա նրանց իրավունք չի վերապահում խոսելու ժողովրդի անունից և իրականացնելու քայլեր ընդդեմ երկրի, ազգի, ժողովրդի և, առանձին դեպքերում, նաև ընդդեմ Նիկոլ Փաշինյանի»,- ասել է Արծվիկ Մինասյանը:

Ըստ նրա՝ այստեղ է, որ Դաշնակցությունը կանգնած է ժողովրդական պահանջի կողքին: «Առաջին արձագանքողը եղանք Նիկոլ Փաշինյանի խնդրանք-առաջարկին՝ համագործակցել իր կառավարության հետ, մտնել իր կառավարության մեջ: Սա մեր պահանջը չի եղել, եղել է Նիկոլ Փաշինյանի խնդրանքը, որ՝ առանց Դաշնակցության մենք չենք կարող ընթացք ունենալ: Մտանք, ներկայացրինք ծրագրեր, փորձեցինք առաջ գնալ, բայց եղավ այն, որ էյֆորիան, զգացականությունը մեր քաղաքական իշխանություններին տեղափոխեցին այլ դաշտ, նրանք անհասկանալի կերպով դավադիրներ սկսեցին փնտրել Դաշնակցության մեջ, նրանք սկսեցին անհասկանալի կերպով հակառակորդ համարել Դաշնակցությանը: Ինչո՞ւ, որովհետև արմատավորվել էր 1990-ականների ազգի տականքի մոտեցումը»,- ասել է Արծվիկ Մինասյանը:

ՀՅԴ Հայաստանի ԳՄ անդամը պատահական չի համարել, որ այսօր կառավարման համակարգում Լևոն Տեր-Պետրոսյանը և նրա գաղափարակիցները սկսել են էական դեր խաղալ:

«Սա վտանգավոր ճանապարհ է՝ ազգը պառակտելու, ազգային մտածողությունը քայքայելու ճանապարհ է, և սա է, որ զգուշացնում ենք Նիկոլ Փաշինյանին, սա է, որ խնդրում ենք օրվա իշխանություններից, որ՝ մի՛ գնացեք այդ ճանապարհով, երկրում մի՛ փնտրեք թշնամիներ, ատելությունը մի՛ դարձրեք ամենօրյա գործողություն, վրեժխնդրությունը մի՛ դարձրեք դատական համակարգի դեմ գործողության առանցք»,- ասել է նա:

Արծվիկ Մինասյանը դատապարտել է դատարանների նկատմամբ ճնշումը՝ ընդգծելով, որ  դատարանն անկախ է՝  քաղաքական իշխանությանը չենթարկվելով, և եթե պետք է նախկինի նման հեռախոսով արդարադատություն իրականացվի, ուրեմն ժողովրդի հսկայական էներգիայով ձևավորված շարժումը նոր արժեք չի ստեղծել ու փոշիացել է:

«Ժամն է արդեն, որ գիտակցեք՝ 90-ականների մերժված, ապազգային մոտեցումը տեղ չունի ապագա Հայաստանում, ա՛յն Հայաստանում, որը ձևակերպում եք շատ սիրուն՝ «երջանիկ Հայաստան», բայց դա չի կարող անցնել՝ ազգի մեջ «սև» ու «սպիտակ» փնտրելով, Արցախում դավադիրներ փնտրելով: Սա՛ ենք մենք ուզում հասկացնել, բացատրել, սա՛ է մեր ամենօրյա գործողությունների առանցքը: Բայց դիմացից եկող ազդակները համահունչ չեն մեր այս մտահոգություններին, մեր անհանգստություններին, ազգային պատկերացումներին, և եկել է ժամանակն ավելի վճռական լինելու այս հարցում: Օրվա իշխանությունը պետք է գիտակցի, որ եթե ինքը շեղվում է  ժողովրդական պահանջով ձևավորված ազգային նպատակներից, ուրեմն ինքն ապագա չպետք է ունենա, ուրեմն ինքը պետք է հեռանա, տեղը զիջի ազգային մտածողությամբ մարդկանց, քաղաքական ուժերին՝ Սփյուռքի ամբողջ ներուժի համախմբմամբ»,- ասել է Արծվիկ Մինասյանը:

Օրվա իշխանությունը, ըստ նրա, օր առաջ պետք է գիտակցի ու վերադառնա իրական ազգային արժեքներին, հակառակ դեպքում՝ երկրում անելիք չպետք է ունենա. սա է Դաշնակցության ձգտումը, որը 129-ամյա քաղաքական ուժի  մշտական պայքարն է եղել:

«Եվ եթե հիմա հերթը հասել է մեզ, մենք պարտավոր ենք մեր ձգտումը համախմբված առաջ տանել, և որևէ մեկին, ինչպիսի պաշտոն էլ ունենա, թող չթվա, թե այդ պաշտոնը հավերժ է: Որքանով դու կարողանում ես ազգային նպատակները իրականացնել, այնքանով ես դու արժևորվում»,- ընդգծել է ՀՅԴ Հայաստանի ԳՄ անդամը:

Ներկայից խորհրդարանում Արծվիկ Մինասյանը ոչ միայն Լևոն Տեր-Պետրոսյանի գաղափարակիցներին է տեսնում, այլև նրա ազգակիցներին և մտահոգություն է հայտնում, որ զավակը կրկնում է հոր սխալները: Երիտասարդ կենսագրությունը, նրա խոսքով, իրավունք չի տալիս սխալվելու: «Դուք պարտավոր եք ազգայինը դարձնել ձեր գործողությունների առանցքը. սրան ենք մենք ձգտում՝ իբրև ՀՅԴ»,- նշել է նա:

ՀՅԴ Իրանի Հյուսիսային շրջանի Կենտրոնական կոմիտեի ներկայացուցիչ Սուրիկ Աբնոսյանը ելույթում հիշեցրել է ՀՅԴ ծրագրի առաջին էջում տպված պարբերությունը. «Հայ Յեղափոխական Դաշնակցությունն իր էությամբ, աշխարհայացքով եւ ավանդներով ազգային, սոցիալիստական, ժողովրդավարական եւ հեղափոխական կուսակցություն է»:

Նա մեկնաբանել է այս դրույթները՝ համեմելով Ռուբեն Տեր-Մինասյանի խոսքով՝ գաղափարն արժեք է, երբ ժողովրդականացնում ես այն:

«Մենք պետք է ծանոթանանք մեր ազգի՝ հայրենաբնակ, թե՝ սփյուռքահայ, կացությանը եւ պատմությեանը, մենք պետք է մեր հայրենիքի՝ ազատագրված թե՝ դեռեւս բռնագրավված, վիճակին ու կարգավիճակին լավապես ծանոթանանք, որ ժամանակը երբ հասնի, պատրաստ լինենք ցուցաբերել ճիշտ կեցվածք: Մենք պե՛տք է ազգասիրությունը եւ հայրենասիրությունը ժողովրդականացնենք, սերմանենք ու արմատավորենք մեր նոր սերնդի մտքի ու հոգու մեջ եւս»,- ասել է նա:

Սուրիկ Աբնոսյանը շնորհավորել է ՀՅԴ-ի հիմնադրման 129-ամյակը:

«Բայց ովքե՞ր են դաշնակցականները: Դաշնակցությունը հիմնովին հավաքականությունն է մի շարք հավատացյալ մարդկանց՝ լինեն նրանք գիտնականներ, արվեստագետներ, արհեստավորներ, թե՝ պարզ անհատներ եւ նույնիսկ անգրագետներ, որոնք հավատում են, որ բարին հաղթելու է չարին, լույսը՝ խավարին, արդարությունը՝ անարդարությանը: Եվ նրանք պատրաստ են այդ պայքարում դնել ամեն ինչ, անգամ՝ իրենց կյանքը: Ճշմարտություն է, որ Դաշնակցությունը ծնունդ է առել հայ ժողովրդի ծոցից ու հասակ նետել՝ նույն ժողովրդին ծառայելու համար»,- ասել է նա:

Սուրիկ Աբնոսյանն ընդգծել է, որ ճակատագրական պահին ազգն ու կուսակցությունը միաձուլվում են:

Միջոցառումը եզրափակվել է գեղարվեստական մասով, որի ընթացքում ելույթով հանդես են եկել ՀՅԴ «Ռոստոմ» երիտասարդական միության և «Քրիստափոր» պատանեկան միության անդամները:

Թեհրան այցի շրջանակներում Արծվիկ Մինասյանն այցելել է նաև «Ալիք» պարբերականի խմբագրություն:

 

Ալիևը կայցելի Թուրքիա
18 Նոյեմբերի 2019, 15:31 Ալիևը կայցելի Թուրքիա
yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica